INTATHELI YELANGA
IBUSISWE wukuhanjelwa ngabaholi bezombusazwe bamaqembu ahlukene inkonzo yokwandulela ukulondolozwa kwesidumbu sikaMfu Bhekizipho Khulekani Dludla (99).
Umufi ubizelwe enkosini ngoMgqibelo owedlule emuva kokuxinwa wukugula isikhathi eside. Inkonzo ibanjelwe enkundleni yezemidlalo eMelmoth. UDludla ungowokuzalwa eMfanefile, eMelmoth. Wazakhela udumo ngezintshumayelo zakhe ayezethula emsakazweni womphakathi uKhozi FM.
Likhulu kakhulu ibanga alihambile emhlabeni eshumayela ivangeli lobunye. Ungomunye wabasunguli bebandla ebelihola i-United Congregational Church of Southern Africa (UCCSA). Wazifaka ezinhliziyweni zamalungu omphakathi ngokuba yisishoshovu esasilwela amalungelo abantu.
Phakathi kokunye ngaye kuvela ukuthi wake waba ngushansela wesikhungo sezemfundo iMangosuthu University of Technology. Waba ngusihlalo wesigungu sesikole iNanda Seminary School.
UDludla wayenobudlelwano bobungani nomsunguli we-IFP uMntwana wakwaPhindangene iNkosi uMangosuthu Buthelezi.
Phakathi kwabaholi abayingxenye yenkonzo yokuvaleliswa kwale ngqalabutho kubalwa uMnu Jacob Zuma owayengumongameli wakuleli futhi ongumholi weqembu lezombusazwe i-MK Party, uMnu Velenkosini Hlabisa ongumongameli we-IFP. UNdunankulu waseKZN, uMnu Thami Ntuli nekhabhinethi yakhe.
Phakathi kwabanye abaholi bezenkolo abayingxenye yenkonzo kukhona uMfu Hawu Mbatha owasebenza isikhathi eside noDludla.
Uhlelo lwenkonzo luqhutshwa nguMnu Siboniso Duma ongungqongqoshe wezokuThutha nokuHlaliswa kwaBantu KwaZulu-Natal noMnu Mntomuhle Khawula ongungqongqoshe wezeMidlalo, ubuCiko namaSiko KwaZulu-Natal.
