UMSEBENZI wakhe bekuwukushukumisa umjaho ibanga eliwu-30km kuphela kwiComrades Marathon u-Onalenna Khonkhobe, kodwa ngenxa yokujatshulelwa ngabantu emzileni, wagcina esenza okungaphezulu.
Lo mgijimi waseTaung, eNorth West, ekhuluma neRadio 2000 izolo ngoMsombuluko, uthe umsebenzi wakhe bekuwukuba yi-pacesetter, okuwukusiza abagcina beyizingqwele ukuthi benze izikhathi ezingcono kulo mjaho.
Uzakhele igama eqengqeleza phambili cishe amahora amane, ehambe ebingelela izihlwele. Uthi bekumele agijimi u-30km, bese ezongela iSoweto Marathon engoLwezi (November) azokube evikela isicoco sayo. Ugcine esegijima u-75km.
“IComrades yangonyaka odlule beyibanda, ngifike ngayishukumisa kulo nyaka, futhi abantu bakuthandile lokho,” esho.
Uthi uphoqeleke ukuqhubeka nokugijima, esenzela izibukeli.
“Kuthe sengidlula ku-42km, ngabona izihlwele zingijabulela. Ezinye bezithi ‘masiye, masiye!’ ezinye zithi ‘ngiyabheja ngawe!’. Kwezinye izindawo inhlokomo ibingivala izindlebe, abantu bejabula beze bangene emgwaqweni. Yilapho ngibone khona ukuthi kumele ngiqhubeke.”
Umqeqeshi kaKhonkhobe, uTheo Mpolokeng, uthi ushaye imoto waya ebangeni eliwu-35km ukuyocosha lo mgijimi, wafika esedlule ngehubo.
“Ngethuke ngoma ngimbona kumabonakude esaqhubeka nokugijima, ngoba lokho besingakuhlelile. Bengikhathazekile ukuthi uzodonseka imisipha, kuphazamiseke amalungiselelo ethu eSoweto Marathon,” kusho uMpolokeng.
Uthi kodwa umjabulele lo msubathi ngoba uyamazi ukuth uyazifela ngodumo.
UKhonkhobe uyingqwele yeSoweto Marathon, iTwo Oceans Marathon nePrince Mangosuthu Ultra Marathon.
