LUQHUBEKA ngaphandle kwezihibe ukhetho lokuchibiyela kuWard 18 eMandeni, ngaphansi kwesiFunda Ilembe.
Isikhala savuleka ngemuva kokubulawa kukaMnu Phendukani Mabhida owadutshulwa esemzini wakhe kuyona le ndawo. Umufi wadutshulwa nesihlobo sakhe esineminyaka ewu-44, esathola ukulimala.
Lolu khetho luthathwa njengolubalulekile kumaqembu amathathu ayizimbangi ezinkulu kuleli. Umbango omkhulu uphakathi kwe-ANC okuyiyona evikela isicoco, i-MK Party efuna ukuzibonakalisa kubavoti. I-IFP yona ifuna ukudla le ward ukuze izobona amandla ayo.
I-EFF ingelinye lamaqembu angenele umbango walesi sikhundla. Wonke la maqembu akhiphe abaholi bawo abangosondonzima ukuba bayowacelela ivoti ezakhamizini zale ward.
Kulolu khetho iMK Party ifolose ngoMnu Lindani Xhakaza, i-IFP imelwe nguMnu Nkosiyapha Zulu, i-ANC yona igadla ngoMnu Sanele Mathonsi kanti i-EFF yona imelwe nguMnu Malusi Mathunjwa.
Ngonyaka ozayo elakuleli lizobamba ukhetho lohulumeni basekhaya okuyilapho khona kuzobe kuqokwa amakhansela kanti kungenzeka kube nezinguquko kwabanye omasipala bakuleli ngemuva kwalo.
