THANDOLUHE NGUBO
SIKHULU isililo ngokudlula emhlabeni kowayengunobhala-jikelele weNFP, obeseyihloko yezokuxhumana eqenjini uMkhonto Wesizwe Party (MKP), uMnu Canaan Mdletshe.
UMdletshe udlule emhlabeni ngemuva kubandakanyeka engozini yemoto, izolo ebusuku. Imibiko iveza ukuthi ubebuya ukuyokwenza umsebenzi weqembu lakhe, wokukhankasela ukhetho lokuchibiyela obeluseMtubatuba, ku-ward 16, okuyisikhala esavuleka ngesikhathi kushona ikhansela le-IFP, uMnu Qhina Mkhwanazi, phakathi nonyaka.
Kuthiwa uMdletshe ubeyedwa emotweni ngesikhathi ishayisana neloli KwaHlabisa.
I-MKP KwaZulu-Natal isiqinisekisile isigameko, yethembisa ukukhipha imininingwane egcwele ekuhambeni kwesikhathi.
