UZWAKALISE ukujabula ngokuhlanzwa kwegama lawo yihhovisi loMcwaningimabhuku-Jikelele – odabeni oluthinta ukungasebenzisi ngendlela imali enga-phezu kuka-R2 billion, kunyaka mali ka-2023/24 – uMnyango wezeMfundo KwaZulu-Natal, oholwa nguNgqongqoshe uMnu Sipho Hlomuka.
Lokhu kulandela uphenyo olunzulu olwenziwe yihhovisi lomcwaningimabhuku-jikelele, oluveze ukuthi le mali ewu-R2.7 billion yasetshenziswa ngendlela efanele. Okhulumela ihhovisi lomcwaningimabhuku-jikelele, uMnu Africa Boso, uthi isinqumo sokuhlanzwa kwegama lalo mnyango kulokhu, silandela izingxoxo ezijulile ihhovisi labo elibe nazo nezinhlaka ezifanele, okubalwa kuzo nehhovisi likaMgcinimafa waKwaZulu-Natal, eliholwa nguNgqongqoshe uFrancios Rodgers.
Kusuka ekuqaleni konyaka, uMnyango wezemfundo usematheni ngokungasetshenziswa ngendlela kwemali. Kwagcina sekuvele ukuthi uzodinga u-R900 million ukuze ukwazi ukulungisa zonke izidingo zawo. Kwabikwa ukuthi ihhovisi likandunankulu wesifundazwe ngokubambisana nelomgcinimafa wesifundazwe, layikhulula le mali ngemuva kokuyiqoqa kweminye iminyango kahulumeni.
UHlomuka uthi ugculisekile ngemiphumela yophenyo lomcwaningimabhuku-jikelele.
“Imiphumela yalolu phenyo ikhombisa ukuzimisela komnyango ekuqinisekiseni ukwethembeka nokuhlinzeka umphakathi ngolwazi olufanele, futhi oluyiqiniso ngokuphathwa kwemali. Siyakuthokozela futhi okwenziwa ngumcwaningimabhuku-jikelele kokuqinisekisa ukuthi imali iphathwa ngendlela kuhulumeni,” esho.
Eqhuba, uthe le miphumela yophenyo iza nje, umnyango wakhe uqeda kumemezela isinyathelo sendlela yawo yokusebenza, njengoba ukuphothulile ukukhokha imali yokusebenza kwansuku zonke ezikoleni zabaphila nokukhubazeka.
Abazali bezingane ezifunda kulezi zikole, bavuke umbhejazane, bavala amasango ezinye zazo, bekhala ngokungafakwa kwemali yokusebenza kwansuku zonke kwazo. Ukuvalwa kwamasango kudo-nse isikhathi esicela emasontweni amabili. UHlomuka uthi uyakuqonda ukubaluleka kwalezi zikole, futhi umnyango uzokwenza okusemandleni ukuthi zithole izinsiza.
