SENZO SOKHELA
UBINGELELWE ngesibi isibhaxu uSead Ramovic ongumqeqeshi waseGermany olaxaze iTS Galaxy bukhoma kwiTV kubuka izwe lonke.
Uthe uyopholisa ikhanda nomndeni wakhe.
Kakuphelanga isikhathi esingakanani wamenyezelwa njengomqeqeshi omusha weYoung Africans eyizingqwele zaseTanzania.
IYanga ikhombe indlela uMiguel Gamondi owake walolonga iMamelodi Sundowns odabuka e-Argentina.
URamovic usivule kabi isigqiki seYanga le kilabhu itaxwa ngo-2-0 yi-Al Hilal Omdurman yaseSudan kowokuvula u-group A weCaf Champions League ngoLwesibili ntambama.
IYanga ishaywe phambi kwezinkumbi zabalandeli bayo.
URamovic uqala ngonyawo olubi nje, bekubhekwe lukhulu kuyena njengoba uGamondi exoshelwe ukugqoza kwemiphumela.
IYanga iyona ebambe ibhuleki ku-group A ebophele iTP Mazambe yaseDemocratic Republic of Congo neMC Alger yase-Algeria.
IMazembe ibambane ngo-0-0 neMC Alger eCongo ngawo uLwesibili.
