INGQWELE yeComrades Marathon amahlandla amathathu, enamagolide awu-12 kwiComrades Marathon, uBongumusa Mthembu uzokube eyingxenye yeSA Men Run 10km ehambisana ne-5km, ozokuba kusasa ngeSonto kusuka ngo-7 ekuseni eKings Park Athletics Stadium, eThekwini.
Lo mjaho ugubha unyaka wesithathu wasungulwa kanti inhloso yawo wukulwisana nokuhlukunyezwa kwabantu besifazane nezingane. UBig Mike, ongomunye wabadidiyeli balo mjaho, uthe konke sekumi ngomumo, sebelinde usuku lo mjaho.
“Izinto zihamba kahle kakhulu kanti sijabule ngesibalo sabasubathi esibatholile kulo nyaka. Ngingakuqinisekisa ukuthi ingqwele yanyakenye uSibusiso Kubheka uzokube ekhona. Ukuba khona kukaMthembu kusijabulise kakhulu.
“Sinethemba lokuthi kuzokwenziwa izikhathi ezinhle kulo nyaka ngenxa abasubathi esibatholile banohlonzo, lokho kusinika ithemba,” kusho uBig Mike, weVuma FM.
Uqhube wathi ucela abantu besilisa ukuba babe yingxenye yezemidlalo ukuze bahlale beyimiqemane. Kuthiwa umuntu wesilisa ozihlanganise nezemidlalo akanaso isikhathi sokuhlukumeza.
Lo mjaho ILANGA eliyingxenye yawo ungenelwe nangungqongqoshe wezemidlalo wesifundazwe uMntomuhle Khawula, uSihle Zikalala oke waba ngundunankulu wesifundazwe nabanye.
