UNCOMA umdlali we-Orlando Pirates ngokungena enze umehluko omkhulu eqenjini lakhe umqeqeshi weBafana Bafana, uHugo Broos.
IBafana iyiqale kahle i-Afcon iguqisa ngo-2-1 i-Angola koka-group B ngoMsombuluko ebusuku eMorocco.
Amagoli eBafana ashaywe ngu-Oswin Appollis noLyle Foster, kwathi ele-Angola leza noShow.
UBroos akawuvali umlomo ngoTshepang Moremi ongene ngesiwombe sesibili endaweni kaMohau Nkota obecwilile kulo mdlalo.
UMoremi ungene walibeka enethini kodwa igoli lakhe laphikwa yiVAR. Kuthiwa uFoster obemunike ibhola ubesemngceleni ongafanele.
“UTshepang udlale kahle kakhulu, ukungena kwakhe kwenze sakwazi ukuhlasela ngesivinini.
Ungene waba wuhlupho kwizimbangi, wenze omukhulu umsebenzi kule mizuzu ewu-45 ayidlalile,” kusho uBroos.
IBafana izolandela ne-Egypt ngoLwesihlanu ngo-15h00.
I-Egypt nayo ilivule kahle leli qoqo ihlula ngo-2-1 iZimbabwe ngoMsombuluko ebusuku.
IZimbabwe yona izodlala ne-Angola ngoLwesihlanu ngo-14h30.
Imidlalo ye-Afcon namuhla ngoLwesibili iqhathwe kanje:
DR Congo vs Benin 14h30.
Senegal vs Botswana 17h00.
Nigeria vs Tanzania 19h30.
Tunisia vs Uganda 22h00.
