IXEGISIWE imibandela kwabesifazane abafisa ukungenela isicoco sikaMiss South Africa. Kwimingenelo yalo nyaka abangenelayo kumele babe neminyaka esukela ku-20 kodwa futhi bangabi ngaphezu kuka-32 makushaya u-30 August nonyaka. Okunye okungezubhekwa kubalwa ubude bethambo, isisindo somzimba neminyaka yobudala.
“Lokhu kusho ukuthi ongenelayo angaba neminyaka ewu-32 ngesikhathi sokuthwala kwesicoco. Phambilini ongenelayo bekumele abe neminyaka ewu-30 ngesikhathi sokuthweswa isicoco,” kusho abahleli
Ukuvulwa kwemingenelo kuqalwe mhla ka 2 kuyo le nyanga, kuzovalwa mhla ka 11 April, abafisa ukungenela bangangena kwi-website ethi: www.misssa.co.za baphendule imibuzo ekhona, bafake isithombe esiphelele nesiwuhhafu ne-video yokungenela efakwe ekhasini lezokuxhumana longenelayo.
UMia Le Roux othwele lesi sicoco uyale abafisa ukungenela ukuthi bazazi ukuthi bangobani futhi bangakushintshi lokho. “Into ebalulekile eyokuthi uze nenhliziyo nengqondo evulelekile ngoba lolu hambo luzoba ngolunezinselelo, lukutshengise nokuthi ungubani. Uma uya ngenhliziyo yonke, uzophuma uzazi kangcono futhi wazi nokuthi uyasithatha isicoco noma cha,” esho.
