KUBOSHWE owesifazane oneminyaka ewu-37 ngecala lokubulala isinqandamthe sakhe esiyiphoyisa kulandela ingxabano phakathi kwabo. Kubikwa ukuthi umufi oneminyaka engu-50 wehlelwe yilo mshophi engekho emsebenzini.
Kuvele ukuthi lezi zithandani bezihleli, ziphuza ndawonye endlini kamsolwa, eSlastsha, eKhwenxurha, e-Eastern Cape. Kubikwa ukuthi ingxabano isuswe wukuthi umufi utshele umsolwa ukuthi ufuna ukuhamba aye kwenye indawo.
Kubikwa ukuthi umsolwa ube eseyacasuka, wasola umufi ngokuthi uhlose ukuyobona enye intombi yakhe. Kube sekuqubuka ingxabano eholele ekutheni usolwa adonse isagila, ashaye ngaso umufi ekhanda ephindelela.
Okhulumela amaphoyisa uBrigadier Nobuntu Gatane, uthe umsolwa uzinikele emaphoyiseni namuhla ngoMsombuluko ekuseni, wawabikela ukuthi ulwile nomufi, kwathi uma evuka ekuseni, wamthola engasanyakazi. Amaphoyisa abe esenikela endaweni yesigameko, afica umufi elele ebheke phezulu, enezingozi ekhanda, elimele nasengalweni.
UBrig Gatane uthe umsolwa ube esebekwa icala lokubulala nelokudukisa ukusebenza kwengalo yomthetho kanti uzovela maduze enkantolo. Isagila esisetshenziswe ukubulala sibe sesiyathathwa ngamaphoyisa, ngenhloso yokuyosihlola.
