UMPROFETHI waseMalawi uMnu Shepherd Bushiri uthi isibalo samalungu ebandla lakhe i-Enlightened Christian Gathering, manje eselibizwa ngeJesus Nation Church, sikhule ngokuphindwe kahlanu selokhu abaleka kuleli, ngemuva kokudedelwa ngebheyili.
Lo mphrofethi uveze lokhu engxoxweni ekhethekile ne-ENCA.
Wabaleka kuleli ngo-2020 ngemuva kokudedelwa ngebheyili ngamacala enkohlakalo nokushushumbisa imali, alinganiselwa ku-R102 million. Isicelo seNingizimu Afrika sokuba uBhushiri nomkakhe babuyiswe kuleli ukuzobhekana namacala abo sachithwa yinkantolo yaseMalawi, ikhala ngokungaqini kobufakazi, amaphepha angagunyaziwe nokungaphephi kwempilo yabo uma bebuyiswa kuleli.
Uthi akazisoli ngokubaleka kwakhe eNingizimu Afrika, yize kwakuphambene nomthetho. Uthi kunezikhulu zamaphoyisa ezazimfuna izizumbulu zemali ukuze zinyamalalise amacala abhekene nawo.
Engxoxweni ne-ENCA, uBushiri uthe isibalo samalungu ebandla lakhe abhalisiwe kuleli, sesikhule sedlula ku-2 million. Uphawule nangokuvakashelwa nguMnu Floyd Shivambu, ngesikhathi esekuNobhala-jikelele weMK Party, okwaqubula umsindo, kwandalela namazinyo abushelelezi kuleli qembu agcine ngokulishiya.
“Ngesikhathi uShivambo eze lapha eMalawi, wayengazile kimi, Ubezele ezinye izinto. Ngicabanga ukuthi wayeze nakuNkk Joyce Banda, owayengumengameli wakuleli, wabamba imihlangano nabanye osopolitiki. Wabe esethi, ‘ake ngiye enkonzweni, kuyiSonto’. Wafika, sathandaza naye. Unina (kaShivambu) ungomunye wabaholi ebandleni lami eliseNingizimu Afrika.”
