UMfu Thulasizwe Buthelezi uzwakalise ukukhathazeka ngokuvumbuka kukaMnu Jacob Mnisi noNkz Rejoice Tembe owaziwa ngelikaGogo ezindabeni ezithinta Ingonyama Trust.
Esitatimendeni asikhiphile ngokuhoxiswa kwegama lakhe esikhundleni sokuba nguNdunankulu kaZulu uMfu Buthelezi uthe kuyakhathaza ukungenelela kukaMnisi nenkampani yabameli iVan Rensburg Kruger Rakwena Attorneys yaseMpumalanga.
Uveze ukuthi wafunda emithonjeni yabezindaba ngokuqokwa kukaMnu Stephen Rakwena wale nkampani yabameli okuvela ukuthi waqokwa iSilo ukuba abhekelele izindaba ezithinta Ingonyama Trust.
UMfu Buthelezi uthe iSilo kasimazisanga ngokuqokwa kwale kukaRakwena nale nkampani yaseWitbank eMpumalanga.
Uthe ukuba khona kukaMnisi nale nkampani ukwengamela izindaba zomhlaba wakwaZulu akwehli kahle futhi kunomthelela omubi ngekusasa leNgonyama Trust.
Ukuvezile ukuthi uma nebala iSilo sesisithalile isinqumo sokumhoxisa esikhundleni uyasibonga ngethuba nokusebenzela isizwe samaZulu.
Ube esesifisela ukubusa okuhle futhi siqhubeke nokukhula ngamandla.
