UVEZE ukuthi uzobiza ofakazi bakhe, owesilisa osolwa ngokuthumba abulale intombazane, maqede wafihla isidumbu sayo esitamkokweni, saze satholakala ngemuva kwezinsuku sesiqala ukonakala.
Lokhu kuvezwe ngummeli kaMnu Mfanafuthi Kunene, ngesikhathi evele eNkantolo eNkulu yaseThekwini ngecala lokubulala u-Ayabonga Njilo. UKunene ubhekene namacala amathathu, elokuthumba, elokubulala, nelokudukisa ukusebenza kwengalo yomthetho.
ILANGA selibike izikhawu eziningi ngalolu daba kusukela kwenzeka isigameko. U-Ayabonga wagcina ukubonakala esaphila ngomhla ka-24 kuDecember 2024. Wayekade emenywe ngozakwabo ayesebenza nabo phambilini emcimbini owawusendaweni yobumnandi, iCappellos, eMhlanga. Umufi wagcina esesele noKunene owayengumphathi wakhe, ozakwabo sebehambile.
Bahlala kule ndawo baze bahamba ebusuku. UKunene wabiza imoto ekhokhelwa ngebanga, bavumelana ngokuthi uzomshiya emqashweni wakhe njengoba wawusendleleni ebheke kubo kaKunene, eMaotana ngaseNanda.
Kusolwa ukuthi ngesikhathi besendleleni, uKunene wanqabela umufi ukuba ehle emotweni, wadlula naye, okusolwa ukuthi kwathi uma befika kubo (kwaKunene), kwasuka ingxabano eyagcina iholela ekutheni ambulale, qede waphosa isidumbu sakhe esitamkokweni esiseduze nakubo.
Uphenyo lwamaphoyisa lwawaholela kuKunene, owagcina ewakhombisile lapho elahle khona isidumbu sikamufi, esatholakala ngomhla ka-4 kuJanuary.
Njengokujwayelekile, izolo noLwesine inkantolo ibigcwele amalungu omphakathi, abezozizwela ukuthi kuqhubekani ngaleli cala.
Ummeli kaKunene, uNkz Zeera Fareed, utshele inkantolo ukuthi sebekulungele ukuthi selingaqala ukuqulwa icala. Uthe ikilayenti lakhe liyawaphika amacala elithweswe wona. Ukuqinisekisa lokhu, uthe bazoletha ofakazi abayisihlanu ngaphambi kwenkantolo uma sekuqulwa icala.
Umshushisi uNkz Gugu Xulu, uphakamise ukuba liqale ukuqulwa ngoNovember icala njengoba konke sekumi ngomumo. Ijaji Thoba Portia Poyo-Dlwathi, libe selilihlehlisela umhla ka-10 kuwona uNovember kuya kumhla ka-5 December. Add Note
