LIBUYE ngamandla ihhashi uNxakanxaka edla umhlanganiso emjahweni omkhulu kwiNkandla May ngoMgqibelo KwaNotshiza.
Leli hhashi lase-Utrecth elike lawunqoba lo mjaho phambilini izinto zike zangalihambela kahle ngemuva kokuhlakana nojokhi wakhe.
Ngokusho kwendodana kaMdubane Gama ongumnikazi wehhashi uMlamuli uthi kuningi abakulindele kuleli hhashi nonyaka.
UMlamuli uthi balindele ukubona uNXakanxaka egila izimanga emijahweni ezayo okuyiDundee July, iKing Cetshwayo Rural Horseracing neminye.
Ngokunqoba iNxakanxaka ihlomule ngesamba sika-R50 000 kwathi Amazondo angene isibili athola u-R40 00. Womabili lamahhashi ngakaMdubane kanti indawo yesithathu ithathwe nguColchester kaMenzi Buthelezi waseMzinyathi.
Umjaho wanonyaka ubunemijaho ewu-11 kanti bekukhona emibili yabesifazane okowendawo nowesifundazwe.
Lo mjaho bekungokukuqala nonyaka ukuba uxhaswe uMnyango wezemidlalo wesifundazwe okuthiwa ubufake imali ewu-R1million kanti bewuhanjelwe nguNdunankulu wesifundazwe uThami Ntuli.
UNtuli uthe ukhulumile nongqongqoshe wezemidlalo uMntomuhle Khawula ukuba axhase imidlalo yamahhashi yesifundazwe.
“Ngijabule kakhulu ukuthi lo mjaho usukhule waze wafika kuleli zinga. Into engiyibona lana ingijabulisa kakhulu. Ngibonga ukusebenza ngokuzikhandla kwemeya yendawo uNonhlanhla Nzuzu ukuqinisekisa ukuthi lo mjaho uyaqhubeka. Abantu baziqalela wona kuthi abawinile bathole izingubo zokulala. Ngithe uma ngingena lana njengemeya sabe sesishintsha safaka imali. Ngiyajabula ukubona ukuthi sekunehhashi eligoduka no-R50 000. Ngiyacela uMnyango wezemidlalo ukuba ungenelele nakweminye imijaho,” kusho uNtuli.
