UPHUMELE obala ngeminjunju emfikele efika endaweni yesigameko okuphelele kusona indodana yakhe uMnu Musawokuphila Mthethwa onguyise omncane kaMnu Nathi Mthethwa (58) oshone emasontweni amabili adlule ngokuwa esitezi sika-22 ehhotela laseFrance, lapho abeyinxusa laseNingizimu Afrika khona.
UMthethwa nguyena obehola amalungu omndeni ukuyolanda isidumbu sikamufi nokuqhuba usiko lwehlahla ukubuyisa isidumbu eNingizimu Afrika. Ekhuluma enkonzweni uMthethwa, ubonge uMengameli Cyril Ramaphosa nethimba loMnyango wezobuDlelwano bamazwe ngokubambisana nomndeni ngesikhathi sobunzima.
Uchaze ngobunzima bokufika endaweni yesigameko lapho umphefumulo wendodana yakhe uphumele khona. Uthi wehlulekile wukuzibamba, wasikhihla isililo ngenxa yobuhlungu. Uthe nakuba ebesezinhlungwini kodwa akakhohlwanga wukucabanga umakoti wakwakhe, uNkk Philisiwe Mthethwa, uMaButhelezi. Ubonge uMaButhelezi ngokuba seduze kwendodana yakhe kwaze kwaba sekugcineni.
Indodana kamufi, uMkhululi Mthethwa, ibonge ukubumbana komndeni ukuqinisekisa ukuthi uyise ubuyiselwa kuleli ngaphandle kwezihibe. Abantu bamazinga ahlukene kusukela kosopolitiki, osomabhizinisi namalungu omphakathi bebephume ngobuningi ukuyophelezela umufi owake waba ngungqongqoshe weminyango eyahlukene okubalwa kuyona owamaphoyisa, owezemidlalo, ezokungcebeleka nezobuciko namasiko.
Amalungu omphakathi waseDondotha namaphethelo, aphume agcwala onqenqemeni lomgwaqo ebuka ujenga lwezimoto ebeziholwa ngeyaseCebolethu, ebithwele isidumbu sikamufi, zilibhekise eSiyabonga Sangweni Sports Complex ekule ndawo.
