UVUKWE umunyu echaza ngokuthola indawo emdlalweni omusha umlingisi osanda kuzakhela igama kwezikamabonakude uNonsikelelo Mthiyane wodumo lokudlala indawo kaSibongile kwiSibongile And The Dlaminis esiteshini esikhokhelwayo esingaphansi kweMultichoice uMzansi Wethu.
UNonsikelelo wethulwe njengomlingisi ozodlala indawo ephambili emdlalweni owuchungechunge ozoqala ukukhonjiswa kwiSABC 1 ngomhla ka-28 ku-April obizwa ngokuthi Amalanga Awafani ngo-18:30 kusihlwa.
Le ntokazi kubukeka kuyihambela kahle kulo mkhakha njengoba inonyaka iqalile kulo mkhakha isithola ukudlala indawo ephambili kulo mdlalo oqoshwa inkampani eqopha Uzalo iStained Glass Productions.
Emcimbini obuseSalt Rock obuhanjelwe yizicukuthwane ezahluke uNonsikelelo wethulwe nabanye ozakwabo abazobonakala kulo mdlalo okubalwa kubo uFanele Zulu, Sandile Mdletshe, Nompumelelo Mzelemu, Melusi Yeni, Sthandwa Nzuza, Sbonakaliso Mazibuko, Mduduzi Nombela, Ndumiso Dlamini nabanye.
Echaza ngokuthola le ndawo uNonsikelelo okuwudlalo wakhe wesibili omkhulu kumabonakude kulandela iSibongile And The Dlaminis uthe uzizwa enokubonga kakhulu ngokuthola lel thuba.
Le ntokazi esencane ayikwazanga ukuqhubeka nokuchaza ngaleli thuba layo njengoba imane yachiphiza yakhala yagcina isiduduzwa ngozakwabo.
Lo mdlalo kugabe kakhulu ngempilo yamabhinca njengoba kulindeleke kuthi ihehe inqwaba yababukeli abathanda le mpilo nomculo kamaskandi.
Ukujoyina kwale ntokazi kulo mdlalo kuqinisekisa izinsolo zokuthi kuyaphela ngomdlalo iSibongile And The Dlaminis njengoba iningi labalingisi balo mdlalo sebeqalile ukubonakala kweminye imidlalo kamabonakude.
