UDEDELWE ngebheyili ka-R5000 lowo owabe enguNgqongqoshe wezokuVikelwa kwoMbuso nelungu lePhalamende le-ANC uMnu Bongani Bongo obhekene necala kozama ukugwazela uSihlalo wekomidi elalijusthwe yiPhalamende ukuphenya kabanzi ngenkohlakalo eyenzeka ezinkampanini ezingaphansi kukahulumeni okubalwa kuzo i-Eskom, Denel ne-Transnet.
UBongo ubevele eNkantolo yeMantshi yase-Cape Town ngoLwsesibili, ngaleli cala elenzeka ngo-2017 njengoba selibuya isibili lapho kulindeleke ukuthi liqale phansi ukuqulwa.
UBongo waboshelwa leli cala ngo-2021 kodwa owayeyinhloko yamaJaji e-Western Cape uDkt. John Hlophe wawahoxisa amacala ayebhekene nawo ethi kushoda ubufakazi.
Isinqumo sika-Hlophe kasilugculisanga uphiko olwengamele ezokushushisa kuleli i-NPA njengoba yasidlulisela eNkantolo eNkulu yokweDluliswa kwamaCala eyanquma ukuthi uBongo kumele abuyele enkantolo icala lakhe liqulwe kabusha.
Enkantolo, umbuso utshele imantshi ukuthi kawuphikisani nokuthi uBongo akhululwe ngebheyili, nokuyilapho ekhululwe khona ngayo ngaphansi kwemibandela eyejwayelekile.
