ISHIYE imibuzo incwadi kaNkk Duduzile Zuma Sambudla oyilungu leMP Party futhi oyindodakzi kaMnu Jacob Zuma ongumsunguli waleli qembu.
NgoLwesibili leli qembu liyalele uDuduzile ukuba axolise kuMengameli waleli qembu, uNobhala Jikelele walo uMnu Floyd Shivambu, ubuholi namalungu aleli qembu nasezinhlakeni alimele kuzona okuyikhokhasi yeMK Party ePhalamende likazwelonke nakwiPan-African Parliament.
Lokhu kulandela ukugxibha nokuthuka uShivambu enkundleni yokuxhumana i-X (Twitter).
UDuduzile uyalelwe ukuba axolise ngokushesha ngaphandle kokubeka imibandela ngaphandle kwalokhu angase athathelwe izinyathelo ezingaholela ekutheni buhoxiswe ubulungu bakhe kuleli qembu. Encwadini yakhe yokuxolisa uDuduzile uxolise kuMengameli waleli qembu uZuma nakubuholi baleli qembu.
Uthe nakuba enowakhe umbono ohambisana nokukhathazeka ngendlela uNobhala Jikelele waleli qembu asingatha ngayo ezinye zezinto kodwa uyakuqonda ukuthi kunezindlela zangaphakathi okumele azilandele.
Ukubeke kwacaca ukuthi uyaxolisa ngesenzo sakhe futhi ubengaqondile ukuthunaza isithunzi seqembu.
Nakuba ebale zonke izinhlaka abejutshwe ukuba azibale uma exolisa kodwa akukho encwadini yakhe lapho eveze khona ukuxolisa kwakhe kuNobhala waleli qembu okunguyena abemgxibha kule nkundla yokuxhumana.
Uphethe ngokuthi njengelungu leMK Party eliqotho uzimisel ukuhlonipha lonke uhlelo lwangaphakathi kuleli qembu.
