UDUTSHULWE wabulawa ngamaphoyisa obesolwa ngokuba ngunqondonqondo ekufeni kobeyilungu leNkatha Freedom Party (IFP) ePhalamende, uMnu Khethamabala Sithole waseQhudeni, eNkandla.
Ngokuthola kweLANGA, uZamani “Ngila” Ximba, obefunwa uthuli ngokubulawa kukaSithole, utholwe ebhacile emzini othile oseDuduza, eGoli, njengoba amaphoyisa ebekade elokhu elandela umkhondo ngaye.
Ngokwesitatimende esikhishwe yihhovisi likakhomishana wamaphoyisa eGauteng, amaphoyisa alunywe indlebe ukuthi uZamani ucashe kule ndawo.
“Ngesikhathi singena endlini, uXimba ukhombe iphoyisa ngesibhamu, laselimdubula iphoyisa,” kusho isitatimende.
USithole nabanye ababili badutshulwe mhla ka-31 kuNhlaba (May) ehostela eKatlehong. Emuva kwalesi sigameko, kwajutshwa ithimba elihlonishwayo lamaphoyisa aseGauteng ukuba lilandelele umsolwa.
UZamani Ximba kuthiwa nguyena owadubula, kanti abanye ayenabo okunguBhekokuhle Sithole (36) noMkhululi Sithole (33) baboshwa emuva kwezinsukwana kwenzeke isigameko, njengoba besagcinwe ngaphakathi ngecala lokuzama ukubulala laba abasinda, yena uZamani waphunyula, wabaleka.
Bazobuyela enkantolo mhla ka-20 kuLwezi (November) laba ababoshiwe.
UMnu Khethamabala, kusolwa ukuthi ukufa kwakhe kumayelana nokuthi wayeyokhuza ukuganga kwabafana bangakubo okuthiwa bakwenza eGoli, njengoba umsolwa oshonile, nababoshiwe bonke bengabaseNkandla.
