NONHLAKANIPHO SHINGA
KWETHULWE umakadebona kwezahulumeni wasekhaya, uMnu Mpumelelo Mnguni njengemeneja kumasipala okumanje abaholi bawo abathathu babhadla ejele. UMnu Mnguni, wethulwe nguNgqongqoshe woMnyango wezokuBusa ngokuBambisana nezoMdabu, uMfu. Thulasizwe Buthelezi, ngoLwesibili khona KwaNongoma. Kwenzeka lokhu nje izolo bekuvele enkantolo abaholi abathathu balo masipala okuthiwa babekwe amacala angu-57 enkohlakalo okuyimeya kulomasipala uMnu Mshangane Ndabandaba, uMnu Sabelo Nkosi oyisekela lakhe noNkz Babongile Sithole onguSomlomo. Laba baboshwe ngesonto eledlule babingelela inkantolo izolo ngoMsombululo banqatshelwa ibheyili.
UMfu. Buthelezi uchaze isimo sezimali kulomasipala njengesibi kakhulu.
“Lomasipala uqophe umlando omubi ngokuba ngowokuqala ukuthi kuboshwe izikhulu zawo ezintathu kanye kanye. Kuyimanje ucwile esikweletini sika-R16 million,” kusho yena.
UMnu Mnguni onomlando omude komasipala uke wasebenza kulona wakwaNongoma, wasebenza kowesiFunda uThukela, umasipala iNkosi uMtubatuba nabanye.
Uthe naye kusazodinga ahlolisise kahle ukuthi njengoba konakele kangaka nje kulomasipala kumele kuqalwe ngakuphi ukulungisa.
“Imizamo engijwayele ukuyisebenzisa uma ngifika komasipala angeke ilunge lapha. Ngizothatha lonke lelisonto ngihlangana nabaphathi ukuze ngithole kahle ukuthi yini inkinga,” kusho yena.
nonhlakaniphos@ilanganews.co.za
