UHLOSE ukuthola izizathu ezenza omasipala bahluleke ukuhlinzeka umphakathi ngezidingo uNgqongqoshe wezokuBusa ngokuBambisana nezoMdabu kuzwelonke uMnu Velenkosini Hlabisa.
Lokhu kuza ngemuva kokuba umnyango wakhe uthule uhlelo lokubuyekezwa kwendlela yokusebenza komasipala iWhite Paper on Local Government ka-1998, okwakuhloswe ngayo ukuthuthukiswa ukuhlinzeka imiphakathi ngezidingo kanye nokuqinisa indlela omasipala abasebenza ngayo. Kulolu hlelo umnyango uhlose ukuhlolisisa imbangela yokungasebenzi ngendlela komasipala.
Lokhu kuzokwenzeka ngokuthi umnyango uhlaziye ukuphathwa kwemali, ukuqinisekisa ukuthi ubuholi obusezikhundleni bukufanele yini ukuba kuzo, ukubambisana komasipala nomphakathi kanye nokuvulela izakhamizi zakuleli ukuba ziphawule, zibeke imibono ngendlela ezifisa omasipala basebenze ngayo. Ekhuluma uHlabisa, ukhale ngenhlese yepolitiki eyengamele omasipala, nakholwa ukuthi ingenye yembangela zokungasebenzi ngendlela komasipala.
“Enye yezinkinga ezinkulu ekumele silwe nayo ukulwa nenhlese yepolitiki komasipala, sino-masipala abaningi abangekho esimweni esikahle ngenxa yepolitiki. Lesi singesinye sezizathu esenza sibone omasipala benezimenenja zikamasipala ezimbili, ababhekelele imali nabo bangababili. Omasipala abakulesi simo nabalawulwa yipolitiki kabawuhlinzeki umphakathi ngezidingo,” esho.
Uthi lesi sinqumo sokubuyekezwa kokusebenza komasipala ukuqinisekisa ukuthi zonke izinto zenziwa ngendlela komasipala futhi uyaqiniswa umthetho wokuqashwa kwabantu ezikhundleni eziphezulu. Uthi ukubuyekezwa kulindeleke ukuba kube sekuphelile ngoNdasa (March) wonyaka ozayo.
“Uma siphothula ngoNdasa silindele ukuthi sizobe sezitholile izindlela ezifanele ekuzosetshenzwa ngazo kuphinde kuqinisekiswe ukuthi ezikhundleni eziphezulu kuqashwa abantu abakufanele ukuba kuzo ukuze kuhlinzekwe imiphakathi ngezidingo. Sekuyikhathi eside abanye omasipala besingethwe yinkohlakalo, ukungasebenzi ngendlela futhi benganakiwe, okwenze abantu balahlekelwe yithemba kubo (omasipala). Kumele silwe nalokhu sithole isisombululo,” esho.
Uthi imibono yomphakathi ngezifiso zabo zokuphathwa komasipla izovuleleka kuze kube umhlaka 30 wenyanga ezayo.
