UBUYELWE wukuzethemba umculi kamaskandi uSphesihle “Limit” Nala waKwaNxamalala, eNkandla, ethula ngokusemthethweni i-albhamu yakhe entsha esihloko esithi, “Number 10” ngoMgqibelo eWorkshop, eThekwini.
Emcimbini wakhe bekubuthene izinkumbi zabantu. ULimit uthi emlandweni womculo wakhe, kuyaqala ukuthi ezinsukwini eziwu-8 ekhiphe i-albhamu entsha, kube kuwukuthi izingoma ezintathu kuyona zihlanganise u-3 million wezibalo zabantu abazilalelile. Kulezi zingoma, ingoma ngayi- nye isihlanganise u-1 million.
Phakathi kwalezi zingoma, kubalwa kuzona ethi, Ngimbe Lomhlabathi, Unyoko ngeTray, nethi AmaBaffalo nama-Elephant. Utshele abezindaba ukuthi nakuba bekukhona abebethi usewile njengoba nyakenye engayikhiphanga albhamu entsha, akagxilanga ezinkulumweni zabo ezimbuyisela emuva, kodwa unake kakhulu laba abakholelwa ekhonweni lakhe.
“Bakhulumile abantu abaningi besho abakuthandayo, bethi seku- phelile ngami kanti akunjalo. Le albhamu yami ingiqophele umlando futhi kuyaqala ukwenzeka lokhu. Ngiyabonga kakhulu kubantu abangesekile, ngiyabathembisa ukuthi lo mculo wami bazowuthokozela,” kusho uLimit.
Kulo mcimbi wakhe utheleke ngendiza. Abantu kabakholwanga endiza emoyeni.
Echaza ngalokhu, uthe uma uyiciko kubalulekile ukuqhamuka namasu azophakamisa igama lakho. NgeSonto uhambele eJeppe, eGoli nakhona eyokwenza esifanayo. Uthi umkhankaso wakhe omkhulu wukuba umculo awuhambise kubantu.
Phakathi kwabaculi abebeyingxenye yomcimbi kubalwa uNjoko, uNtencane, uNjabulo Langa, uQuality Biyela nabanye.
Lo mculi uveze phambilini ukuthi, umculo wakhe ufuna ukuwukhangisa nakwezinye izifundazwe. Uncome izifundazwe i-Eastern Cape ne-Western Cape eKapa, ngokukhokha kahle uma ziqashe iciko emicimbini yazo. Uthi amaciko asekwa ngeqiniso kulezi zifundazwe, iyahlonishwa imisebenzi yawo.
