AKUNAZINGUQUKO ezitheni ezenziwe kwisabeLo sezibonelelo zikahulumeni.
Kwisabelomali asethule ngoLwesithathu uMnu Enoch Godongwana onguNgqongqoshe wezeMali, umemezele ukuthi umholo wezalukazi uzoqhubeka ngendlela ekwakumenyezelwe ngoNdasa (March) ukuthi wenyuka ngayo kulo nyaka.
Kwisabelomali sangoNdasa esihoxisiwe uGodongwana wayememezele ukuthi ngoMbasa (April) lo mholo wezalukazi wenyuswa ngo-R120, bese kuthi ngoMfumfu (October) nonyaka wenyuswe ngo-R10. Lokhu kuzowenza ubewu-R2 320.
UGodongwana uphinde waphawula ngesibonelelo sabangasebenzi sesikhashana, esasungulwa wuhulumeni emuva kokubheduka kweCovid-19, esibizwa ngokuthi yiSocial Relief of Distress (SRD). Uthe lesi isikhathi salesi sibonelelo sizokwelulwa kuze kube sekupheleni kukaNdasa ngonyaka ozayo.
Namanje uGodongwana akakaphumi nazwi eliqondile ngokuthi ngabe lesi sibonelelo sizokweguqulwa yini sibe wumholo omileyo, okungewona owesikhashana. Sekunesikhathi izinhlangano ezahlukene zomphakathi okubalwa kuzo iPayTheGrants kanye neBlack Sash nezinye, zilwela ukuba lesi sibonelelo siguqulwe sibe ngesizotholakala unomphela iBasic Income Grant (BIG), singalokhu siphelelwa yisikhathi. Lezi zinhlangano zilwela nokuba sikhushulwe ngoba zithi mncane kakhulu lo R370 oholwa njengamanje.
UGodongwana uthe uhulumeni usaqhubeka nokubhekisisa izindlela zokuthuthukisa sihambisane nokwandiswa kwathuba emisebenzi.
Kulezi zindlela athi zibhekwa wuhulumeni kuhlanganisa nokucutshungulwa kwezibonelelo zabafuna umsebenzi kanye nezinye izindlela. Uthi inhloso kahulumeni akukhona nje ukunikezela ngosizo olusheshayo, kodwa wukuvula amathuba emisebenzi, ukuze abantu bakwazi ukuba namandla okuzakhela ikusasa labo nemindeni yabo.
