NGESIKHATHI evula inkulumo yakhe yesabelomali uNgqongqoshe wezeMali, uMnu Enoch Godongwana, uqale ngokuphawula mayelana nokungabikhona kukaMengameli uMnu Cyril Ramaphosa ephalamende, emhlanganweni wokwethulwa kwesabelomali sanonyaka.
Amaqembu aphikisayo okubalwa kuwo i-Economic Freedom Fighters (EFF) kanye noMkhonto weSizwe Party (MKP), amgxeke kakhulu uMengameli Ramaphosa ngokuthi uhambe waya e-US eyohlangana noMengameli uMnu Donald Trump.
UGodongwana utshele amalungu ephalamende ukuthi bayixoxile indaba yokushayisana kosuku lomhlangano kaRamaphosa noTrump, kanye nosuku lokwethulwa kwesabelomali ephalamende eCape Town.
Uveze ukuthi ngesikhathi bebhunga ngalolu daba, kuvele umbono wokuthi kuphakathi kokuba kuhlehliswe uhambo lwaseMelika, noma kuhlehliswe usuku lokwethulwa kwesabelomali.
“Sinqume ukuthi akukho ebesingakuhlehlisa phakathi kohambo lwase-United States kanye nokwethulwa kwesabelomali,” kusho uGodongwana.
Njengoba ubengekho uRamaphosa, kanjalo neSekela Mengameli uMnu Paul Mashatile ubengekho njengoba eseFrance ngokomsebenzi.
URamaphosa ubeke uMnu Gwede Mantashe onguNgqongqoshe wezokuMbiwayo, ukuba abambe esikhundleni sakhe.
I-MKP kanye ne-EFF bagxeke uRamaphosa, bambeka njengomuntu obudedengu ngokuhamba ashiye umhlangano obaluleke kangaka wokwethulwa kwesabelomali, esesethulwa okwesithathu.
Kungokokuqala ukuthi ukwethulwa kwesabelomali kube nezingqinamba ezenze ukuba sihlakazwe siqalwe phansi. Lawa maqembu aphikisayo athi lokhu kukhomba ukuthi izwe libhekene nenhlekele, kodwa uRamaphosa uhambe washiya lo mhlangano.
