UMENGAMELI we-EFF uMnu Julius Malema uchitha eyokuthi basebenzisane neDA, banquma ukuya eNkantolo ePhakeme yaseWestern Cape, odabeni obeluphikisana nokwenyuswa kwentela yokuthenga iVAT ngo-0.5%.
UMalema ubekhuluma nabezindaba namuhla ngoMsombuluko emini, ngemuva kokuba inkantolo inqume ukusihoxisa isinqumo sokwenyuswa kweVAT esamanyezelwa kuNgqongqoshe wezeMali uMnu Enoch Godongwana. Ngeledlule ungqongqoshe umemezele ukuthi ngeke isanyuswa iVAT, singakaphumu isinqumo senkantolo.
Uthe iqembu lakhe kalisoze lasebenzisana neDA, kodwa lokho kakusho ukuthi ngeke leseke into engalungile, liyeke elungile ngenxa yezizathu zepolitiki.
“Indlela umthetho osebenza ngayo, uma uya enkantolo ngodaba oluthile, kutholakale ukuthi kukhona osefake udaba olufanayo nolwakho, udaba lwenu luyahlanganiswa,” esho.
Uthi lawa maqembu aye enkantolo ngezizathu ezingafani.
“Thina sibhalele usomlomo wephalamende incwadi phakathi kwamabili, (abeDA) bavuka ekuseni babona incwadi yethu, nabo babhala eyabo. Bebekhuluma ngezinto ezehlukile kunezethu.
“Uma ubuka kahle isinqumo senkantolo, konke lokhu ekunqumile kusemaphepheni (prayers) e-EFF, kunjengoba kunjalo. Uma ubuka amaphepha eDA, uwaqhathanisa nesinqumo senkantolo, uyabona ukuthi iye enkantolo ngezinye izizathu.”
