INKANTOLO yaseMangaung, eFree State, imgixabeze ngesigwebo sokudilikelwa yijele owesilisa (40) olahlwe yicala lokububeza ngokocansi indodakazi (16) angayizali, wayithelela ngegciwane lesandulela-ngculazi.
Kubikwa ukuthi umgilwa wehlelwa yilo mshophi ngo-2020, ngobusuku yena nodadewabo omncane belele emkhukhwini nomgwetshwa eBloemspruit, khona eFree State.
Kuthiwa unina wayengekho ngosuku lwesigameko njengoba ayelaliswe esibhedlela, ngenxa yokugula.
Isisulu sabikela isihlobo ngalolu daba, kwavulwa icala esiteshini samaphoyisa, ladluliselwa ophikweni lwamaphoyisa aphenya amacala athinta udlame lwasemindenini, ukuhlukunyezwa ngokocansi kwabesifazane nezingane emiphakathini.
Ithumba labhoboka ngesikhathi isisulu sibanjwe wukugula, okwathi uma sihlolwa igazi kwatholakala sinaleli gciwane, okuyilapho khona sabe sesibhoboka ukuthi sanukubezwa nguyise.
