UKUPHUMELA obala kwesisulu ngokunukubezwa kwaso yilungu lomndeni eminyakeni ewu-12 eyedlule, kuholele ekutheni ligwetshwe udilikajele ngoLwesine. Kubikwa ukuthi iNkantolo yesiFunda yaseBloemfontein igwebe uninalume wesisulu (ongeke adalulwe ukusivikela) udilikajele ngaleli cala alenza ngo-2012.
Ngokwesitatimende samaphoyisa, isisulu sasineminyaka ewu-10 ngesikhathi sehlelwa yilo mshophi. Kuvele ukuthi emuva kweminyaka isisulu sithule nale mfihlo, size sagonyuluka kosonhlalakahle ngo-August wangonyaka odlule. Siveze ukuthi uninalume waso waqala ukusinukubeza ngokocansi sineminyaka ewu-10.
Kubikwa ukuthi ngemuva kokuba sigonyulukile, kube sekuvulwa icala idokodo ladluliselwa ophikweni lweFamily Violence, Child Protection and Sexual Offences. Umphenyi wecala uSergeant Matlale Sello uphenye leli cala ngaphandle kobufakazi be-DNA njengoba bese kuneminyaka eminingi icala lenzeka. Ukusebenza kanzima komseshi kugcine kuholele ekutheni uninalume wesisulu agwetshwe udilikajele ngaleli cala.
