UMFUNDISI waseNigeria, obenebandla iJesus Dominion Church International, uTimothy Omotoso, uselifulathele elakuleli. Uhambe ngeSonto ntambama, esukela e-OR Tambo International Airport, eGauteng, kanti amabombo uwabhekise kwelakubo eNigeria.
UMnyango wezaseKhaya kuleli, uthe uMfundisi Omotoso, akadingeki kuleli zwe, iminyaka emihlanu ezayo. Ubesejele njengoba aboshwa ngamacala okudlwengula nokuthumba abantu besifazane ababekhonza ebandleni ayelihola.
Ugcine ephume phambili kuwona wonke amacala angama-30, abebhekene nawo. Kugxekwe kakhulu uphiko lwezokuShushisa kuleli, iNational Prosecuting Authority (NPA), ngokuphuma phambili kuka-Omotoso, izinhlangano ezahlukene ezingenzi nzuzo nezilwela amalungelo abantu, nezezenkolo, bebefuna kuqalwe kabusha ukuthethwa kwecala lakhe. Abasifazane ababili abethweswe nabo amacala, base Eastern Cape, inkantolo yabathola bemsulwa nabo.
menzi.jele@ilanganews.co.za.
