NONHAKANIPHO SHINGA
UNGQONGQOSHE woMnyango wezokuThuthukiswa koMnotho nezokuVakasha, KwaZulu-Natal, uMfu Musa Zondi, wethule ngokusemthethweni uhlelo lwezokuvakasha njengoba sekubhekwe emaholidini. Lolu hlelo ulwethule endaweni yezokuvakasha KwaXolo Caves Adventures, KwaXolo ngaphandle kwaseMargate.
Kulendawo kunemigede ephinde ibe nomlando neheha kakhulu abantu abahambela le ndawo. Kuyona kuphinde kube ne-zipline kulabo abathanda ukuntweza emoyeni. Njengamanje kunohlelo lokwakhiwa kwendawo yokudla nokulindeleke ukuthi nayo ibe yingxenye yekuheha izivakashi ezihambele oGwini nesifundazwe zingagcini nje ngalosolwandle.
Ingaphezulu kuka-R6.1 million imali ezosetshenziswa kanti isiyonke ingaphezulu kuka-R8 million.
Ngesikhathi kuhanjelwe kulendawo uMfu Zondi uthe umbono wokusungulwa kwendawo enjengalena uyafisa ukuthi usabalale nakwezinye izindawo ezisemakhaya zibukele kuyo lena.
“Lokhu kuzoqinisekisa ukuthi umnotho kawugcini ezindaweni ezisemadolobheni kepha usabalala uze ufike ezindaweni ezisemakhaya,” kusho yena.
Umcimbi lona bewuhanjelwe ubukhosi bakwaXolo, izimeya zomasipala wesiFunda Ugu, uMnu Zero Mqadi noNkz Zodwa Mzindle kamasipala iRay Nkonyeni.
