UKHUMBUZE amakhansela ngokubaluleka kokuzinuka amakhwapha ngaphambi kokucela ukwesekwa ngamalungu omphakathi, uMengameli we-IIFP, uMnu Velenkosini Hlabisa.
UHlabisa usho lokhu izolo ngeSonto, ngesikhathi ehambele KwaShane, ku-ward 4, eMvoti, lapho ubuholi beqembu lakhe bebuhlangene namalungu omphakathi. Ngesikhathi ethula inkulumo yakhe, uveze ukuthi imisebenzi yamakhansela yiyona ewakhulumelayo kubavoti.
“Kule wadi sinekhansela, ubaba uZondi, osehlale esihlalweni amahlandla amane elandelana. Ukwesekwa kwakhe kubonakale nangemiphumela yokhetho lokugcina kohulumeni basekhaya, njengoba anqoba ngamavoti angaphezu kuka-75%.
“Nginesiqiniseko sokuthi wonke amakhansela njengamanje afisa ukwesekwa ngamalungu omphakathi, kodwa kubalulekile ukuba aqale azibheke isimo sawo ukuthi kuwafanele yini ukwesekwa,” esho.
Eqhuba uHlabisa, uveze ukuthi usizwile isikhalo sezakhamizi zaseMvoti, nakuMasipala wesiFunda uMzinyathi, mayelana nenkinga yokushoda kwamanzi. Wethembise ukungenelela, le nkinga ixazululwe ngokushesha.
“Umnyango engiphathiswe wona wakwaCogta ungenelela kakhulu komasipala, yingakho ngizozama ukuletha isixazululo. Ngizoxhumana nongqongqoshe wamanzi kuzwelonke, sike sivaka-she lapha eMzinyathi, sibone ukuthi kungenzeka njani.
“Ngizophinde ngicele umhlangano nobuholi bomkhandlu ngomhla ka-16 no-17 wenyanga ezayo, sidingide ngezinhlelo
zokuletha amanzi kule ndawo. Sizophinde senze nohlelo esizolusebenzisa ukuhlinzeka abantu ngamanzi. Lokhu sikwe-nzile oThukela sawavula amanzi, saphinde senza nohlelo lokuqhu-beka nokuhlinzekwa kwawo kule minyaka eminhlanu ezayo,” esho.
