PHUMLANI GAMA
UHLEHLISELWE usuku olungaziwa umcimbi wokuvulwa kwamahhovisi oMnyango wezokuBusa ngokuBambisana nezoMdabu KwaZulu-Natal, oholwa nguMfu Thulasizwe Buthelezi oNdini.
Umcimbi wokuvulwa kwamahhovisi alo mnyango bekulindelwe ukuthi ube ngoLwesine. Bekuhlelwe ukuthi uzohanjelwa yiSilo uMisuzulu kaZwelithini, futhi yisona ebesizokwenza umsebenzi wokuvulwa lawa mahhovisi alo mnyango.
Ukuhlehliswa komcimbi kuqinisekiswe nguMnu Thami Ntuli onguNdunankulu waKwaZulu-Natal ngesikhathi ekhuluma neLANGA ngemuva komcimbi wokugujwa kosuku lwabantu abaphila nokukhubazeka kulesi sifundazwe, enkundleni yezemidlalo eRichmond ngoLwesibili.
Okhulumela umnyango wakwaCogta ezifundweni, uMnu Senzelwe Mzila, wenqabile ukuphawula ngalolu daba, kunalokho wanxusa ukuba kuthintwe ihhovisi likandunankulu wesifundazwe.
UNtuli uthe bonke abebeyizimenywa bazisiwe ngokuhlehla kwalo mcimbi.
Uqhube wathi isizathu sokuhlehliswa kwawo kube wukuthi kunezinhlelo ezingakaphothulwa. Uthe uhulumeni wakhe uyahambisana nokuvulwa kwamahhovisi oLundi, kodwa kunemigudu okufanele ilandelwe.
“Njengohulumeni wesifundazwe, sibone ukuthi kunezinto okufanele sidlule kuzona ngokulandela umthetho.
“Sivumelene nongqongqonshe womnyango ukuthi uhlehliswe umcimbi. Ngithi angikuchaze lokhu ngoba ngiyazi ukuthi kunabanye abantu abazokhuluma bathi kungenzeka ukuthu kunenkinga ekhona. Cha, akunjalo.
“Ukuvulwa kwehhovisi, kuzokwenziwa ngosuku oluzoqokwa uma sekuphothulwe zonke izinhlelo,” kusho uNtuli.
