UTHOLE ukugxekwa ngabaningi ezinkundleni zokuxhumana owesilisa obukeka esemncane obhale ekhasini lakhe le-Facebook encoma umngani wakhe osale enkundleni ngesikhathi itholene phezulu ngezulu lezandla phakathi kwakhe namaphoyisa ophiko iNational Intervention Unit (NIU).
Owesilisa owaziwa ngelikaMnqobi, amaphoyisa aKwaZulu-Nata adalule ukuthi uneminyaka ewu-22 futhi ube engumholi weqembu lezigilamkhuba ezihlalise lubhojozi umphakathi waseNanda, eThekwini ngezenzo zobugebengu. Umufi udutshulwe ngoyaba lwezinhlamvu ehamba nomngani wakhe eligcine lingakatholakali igama lakhe eMahlabathini, eVerulam ngoLwesine. Amaphoyisa abika ukuthi asebenzisane nezobunhloli athola umkhondo ngabafi abebeyolanda izidakamizwa nezinhlamvu zezibhamu eMhlanga, eThekwini okwathi uma ebamisa bangakwenza lokho kunalokho bavulela ngenhlamvu bebhekise kuwona.
Owesilisa onekhasi elibhaliswe ngokuthi Onga Sekho ufake izithombe zikamufi emnxusa ukuba abe yidlozi elihle kubona abasele. Uthe bazosala beqhubeka nomsebenzi ngoba benza isifungo. “Noma bengaphela nathi siyakhula ngoba savuma Razo sofela khona Wawa West razo yami neziyalo zakho ngeke ngikhohlwe. Engakusho nje wukuthi siyofela khona,” kusho umbhalo wale nsizwa ebukeka isencane.
