UHLELELWE izinsuku ezine umcimbi wokwamukela ozakhele udumo ohlelweni lukamabonakude kuMzansi Magic, iBig Brother Mzansi Bazozwa, uThandeka Tshabalala, ophume isibili kulolu hlelo obekuvota umphakathi kulona.
UThandeka ongomunye wabaKwaZulu-Natal, obekulolu hlelo, ube sematheni ngesikhathi engaphakathi kulona, wazakhela ugazi kubabukeli balo. Kulindeleke ukuba amukelwe ngenkulu inhlokomo ngoLwesine mhla ka-30 kwephezulu, esikhumulweni sezindiza iKing Shaka International, njengoba kuzobe kungokokuqala ebuyela ekhaya kusukela kwaphela lolu hlelo kumabonakude ngenyanga edlule.
Ngokwesitatimende esikhishwe yithimba elisebenzisana nale ntokazi esiphenduke usaziwayo, kulindeleke ukuthi uma efika esikhumulweni sezindiza, ahlanganyele nabanye babalandeli bakhe abebemeseka, abazibiza ngamaThalians, njengoba eteketiswa kanjalo.
Ngawo uLwesine kusihlwa, kubhekwe ukuthi kube nesidlo sakusihlwa sekhethelo esihleliwe, nezicukuthwane zokumamukela njengoba ekwazile ukumela lesi sifundazwe neTheku imbala. Ngemuva kwesidlo sakusihlwa, kuhlelwe idili lomcimbi wokujuxuza eRockets, eMhlanga, emcimbini ozobizwa ngeLadies Night.
NgoLwesihlanu lweholide lomhla ka-1 kuNhlaba (May), le ntokazi izobuyisela emphakathini ngokuhambela ikhaya labadala eliseLamontville, i-Issy Geshen Lamont Home, lapho izochitha isikhathi nezaguga okuvela ukuthi zisenhliziyweni yayo. Ngemuva kwalokhu kuvakasha, kuhlelwe ukuthi kube nomcimbi, lapho izokwamukela khona izipho eMhlanga.
NgoMgqibelo kuhlelwe iphathi ezoba se-Eden Champagne Garden, eMorningside, eThekwini, ngaphambi kokuba kube ne-after party eLIV Night Club. NgeSonto konke kuzophothulwa eMax’s Lifestyle, eMlazi, emcimbini ozokwethiwa ngokuthi yiSunday Shisanyama Experience.
Nakuba uThandeka enganqobanga kulolu hlelo, kodwa ubethwelwe ngeqoma. Bekunguyena obehlale esematheni ngesikhathi engaphakathi kulona. Kulolu hlelo kwagcina kunqoba uLiema Pantsi, naye osanda kwenzelwa idili lokumamukela ngakubo e-Eastern Cape.
