UMENGAMELI weNkatha Freedom Party (IFP), uMnu Velenkosini Hlabisa, uzovakashela KwaZulu-Natal namhlanje ngeSonto ukuzohlola uhlelo lokubhalisela ukuvota.
Lokhu kuza emva kokuthi kule mpelasonto kuvulwe isigamu sesibili sokubhalisela ukuvota okhethweni lohulumeni basekhaya oluzoba ngoNovember 4, nonyaka.
Phakathi kwezikhungo okulindeleke ukuthi uHlabisa abonakale kuzona kukhona, iQoqisizwe Creche eMagwaveni, oThongathi, iSea Cowlake Secondary School eThekwini, naseMbelebeleni High School, eMlazi. Obunye ubuholi be-IFP buthunyelwe ezindaweni ezahlukene ukuyohlola uhlelo lokubhalisela ukuvota. Izindawo ezizohanjelwa kukhona uGu, Indlovu, Amajuba, Umzinyathi, Uthukela, iZululand, iKing Cetshwayo, Umkhanyakude, Ilembe, iSisonke, nakwezinye izifundazwe okukhona kuzona iGauteng, Eastern Cape, iMpumalanga, iNorth West, iLimpopo, iFree State, iNorthern Cape nakwezinye.
Kanti uNdunankulu wakwaZulu-Natal, uMnu Thamsanqa Ntuli, ubeseKing Cetshwayo, eMpangeni izolo ngoMgqibelo ukuyohlola izikhungo zokuvota. Ohlelweni lukaNdunankulu, uNtuli bekuwugqugquzela intsha nabazobe beqala ukuvota kulo nyaka ukuthi babhalisele ukuvota, nokuveza ukubaluleka kwakho.
Izikhungo zokuvota zivulwe kusuka ngo-8h00 ekuseni kwaze kwashaya ihora lesi 17h00 ntambama. Kanjalo nanamhlanje ngeSonto kuzovulwa ngo-8h00 ekuseni kuvalwe ngesikhathi esifanayo. Umphakathi unxuswa ukuthi uyobhalisa nokuthi uhlole amagama awo ukuthi asavela yini ohlwini labavotayo lapho babebhalise khona.
