INTATHELI YELANGA
UHLULEKA nawukuchaza umuzwa omfikele ngesikhathi ethola izindaba zokuthi ujoyina iKaizer Chiefs u-Asanele Velebayi (22), ophawule okokuqala emuva kokusayina kule kilabhu eyiqale kahle isizini entsha ka-2025/26. IChiefs ivule imidlalo yeligi ngokuguqisa iStellenbosch FC ngo-2-0, yalandelisa ngePolokwane City eyinike u-1-0.
Lokhu kubuyise iqholo lokuqholosha kubalandeli bale kilabhu eyaduma ngokuwola izicoco eminyakeni edlule.
UVelebayi ogijima esiswini, ubengumdlali weCape Town Spurs, okuthe uma ishoveleka ehlathini lesibili – i-ABC Motsepe League – isuka kwiMotsepe Foundation Championship (MFC), iziMpofana zamcosha bhusende. Zimthola mahhala nje, yingoba ngokwemithetho yeNational Soccer League (NSL), njengoba iSpurs ishoveleke esigabeni sama-amesha, lokho kuvulele abadlali bayo ukuba bangasayina nanoma iyiphi ikilabhu.
NGU-ASANELE Velebayi enoKaizer Motaung Jr ongesinye sezikhulu kwiChiefs.
Ephawula ngokujoyina iziMpofana uVelebayi, uthe: “Ngibe nomuzwa ongachazeki. Ngesikhathi ngithola izindaba zokuthi sengijoyina iKaizer Chiefs ngokusemthethweni, ngiqale ngokufonela umama nomndeni wami, ngibazisa ngezindaba ezimnandi. Ngijabule ngendlela eyisimangaliso. Bekuhlale kuyiphupho lami ukuba kule kilabhu, futhi ngihlose ukulibamba ngazo zombili leli thuba.”
Ube esebonga abalandeli beChiefs ngokumamukela ngezandla ezifudule, wathi uyethemba ukuthi bazoba nesizini enhle.
Nokho kusenomsindo ngodaba lwalo mdlali. ISpurs ithi kusengowayo, unqamule inkontileka yakhe ngendlela engafanele. Isanda kafaka isicelo kwiSAFA Arbitration Tribunal ukuba kubuyekezwe isinqumo sePSL Dispute Resolution Chamber esithi uVelebayi uphenduke i-freee agent emuva kokuba iSpurs ishoveleke kwi-ABC Motsepe League.
Lokho kusho ukuthi ikusasa likaVelebayi – waseWestern Cape, kodwa inkaba yakhe ese-Eastern Cape – kalaziwa, usazolinda ukwazi ukuthi uzogcina eligqokile yini ijezi leChiefs.
