UHULUMENI waseNingizimu Afrika uyaqhubeka nokuthola imishanguzo yesifo samatele, njengoba usanda kuthola eminye ewu-3.5 million. Ngokubika kwe-eNCA, iNingizimu Afrika ithole imishangu yeBiogenesis Bago, njengoba isiyonke ekhona ilinganiselwa ku-13.5 million.
Ukulethwa kwale mishanguzo kuqhamuka ngemuva kwesinqumo senkantolo esiyalele uNgqongqoshe wezoLimo, uMnu John Steenhuisen, ukuba avumele abalimi nabanikazi bemfuyo ukuba bakwazi ukuzithengela imishanguzo, ngaphandle kokuthi baze balinde uhulumeni.
Iqeqebana labalimi nabanikazi bemfuyo, bababela enkantolo ngemuva kokuba ungqongqoshe ekuvalile ukuthengiswa kwemishanguzo yamatele. Ungqongqoshe wayefuna ukukhishwa kwale mishanguzo kube wuhlelo lukahulumeni.
Ikomidi lezolimo ePhalamende lisanda kuzwakalisa ukukhathazeka ngokuhamba ngonyawo lonwabu kokusatshalaliswa kwale mishanguzo. Ngokombiko woMnyango wezoLimo, isilinganiselwa ku-2 034 imfuyo esihlaselekile ngenxa yalesi sifo.
USihlalo wekomidi lezolimo ePhalamende, uNkk Dina Pule, uthi beyikomidi basalinde umbiko ogcwele ngokuhamba kohlelo lokusabalalisa le mishanguzo, nokuqinisekisa ukugwema ukusabalala kwalesi sifo.
