BUKHATHAZEKILE ngokukhulelwa kwezingane nabantu abasha ubuholi bukahulumeni waKwaZulu-Natal. Lokhu kuvele ngoLwesibili ngesikhathi uNdunankulu uMnu Thami Ntuli ngokubambisana nongqogqoshe bakhe abane abangaphansi kweSocial Cluster, okungowezempilo, owezokuthuthukiswa komphakathi, owezolimo nokuthuthukiswa kwezindawo zasemakhaya, owezemfundo nowezemidlalo, amaciko namasiko bethula okokuqala uhlelo lokulwisana nokukhulelwa kwentsha.
Lolu hlelo lwethulwe eGamalakhe, ePort Shepstone, ngaphansi kwesifunda Ugu kanti luzosabalala kuso sonke isifundazwe.
UNdunankulu uthi uveze izibalo ezishaqisayo ngokukhulelwa kwabantu abasha nezingane esikhathini esiyizinyanga eziwu-8 ngonyaka owedlule.
“Izibalo zokukhulelwa kwentsha esifundazweni ziyashaqisa. Phakathi kuka-Ephreli noDisemba nyakenye, zingu-26 515 intsha eyakhulelwa. Okuthusa kakhulu ukuthi engu-1 254 yayo ineminyaka engaphansi kuka-14,” esho.
Unxuse ubambiswano phakathi kwezakhamizi zakulesi sifundazwe ukuze kuqedwe lesi sihlava.
