IKHUZA ibuya ingqwele kwezomculo wombhaqanga uShobeni Khuzwayo (osesithombeni), owaziwa kakhulu emculweni kamaskandi njengomsunguli weZingane Zoma, nophrojusa omkhulu wamaqembu kamaskandi adumile endimeni yomculo.
UShobeni ubuyise iqembu lakhe elidala lombhaqanga elibizwa ngeFamily, ngoLwesihlanu elikhiphe i-albhamu entsha esihloko esithi, “Lo Muzi”. Ekhuluma neLANGA uShobeni uthe, ubuyise leli qembu ngenxa yengcindezi yabantu abekhala ngokuyeka kwakhe umculo wombhaqanga.
Uthi uyazi ukuthi kunezinselelo eziningi zokungasekeki kwalo mculo, kodwa unethemba lokuthi luzokwenzeka ushintsho uma beqopha umculo omusha. Uthi bazosebenza ngokubambisana namanye amaciko alo mculo, ukuze baqinisekise ukuthi luyenzeka ushintsho.
“Nginethemba lokuthi uma siwenza lo mculo, mhlawumbe imisakazo izosibona isidingo sokuthi uvuseleleke ngoba kunzima ukulwela into engekho,” kusho uShobeni.
Kule albhamu uthe usebenzisane nabantu abadala endimeni yomculo, okubalwa kubo uThuthukani Cele (kwi-keyboard), namaqembu iMpumelelo naBangani. Leli qembu lidume kakhulu eminyakeni edlule ngama-albhamu alo ayeshisa izikhotha, okubalwa ethi, “Izwa Mina”, i-Akuvumi, namanye.
