OBEYIMEYA kuMasipala wesiFunda uMzinyathi, uMnu Mthandeni Petros Ngubane, odume ngesikhakazelo sakhe uMbomvu, usezomela iNkatha Freedom Party (IFP) esiShayamthetho saKwaZulu-Natal.
Lokhu kuqinisekiswe yimithombo engaphakathi emkhandlwini waseMzinyathi njengoba izindaba zokukhishwa kukaMbomvu esikhundleni zisabalale ekuqaleni kwaleli sonto. Kuthiwa ngempelasonto edlule kube nomhlangano ochazwe njengoshubile wesigungu esiphezulu se-IFP ngekusasa likaMbomvu, kwathathwa isinqumo ngoMsombuluko sokuthi ashenxe esikhundleni.
Obeyiphini lakhe, uNkk T Mchunu nguyena osezokuba yimeya yaseMzinyathi. Isigungu esiphezulu kuthiwa simsuse ngoba singagculisekile ngendlela abesebenza ngayo uMbomvu ngemuva kokuba umkhandlu wakhe uthole imibiko enogcobho iminyaka emibili ilandelana.
UMbomvu naye uyilungu lesigungu esiphezulu, iNational Executive Committee (NEC) ye-IFP. Akayena umholi wokuqala ukususwa yi-IFP esikhundleni sobumeya ayotshalwa esiShayamthetho, njengoba lokhu kwenzeka nakuNkk Zanele kaMagwaza-Msibi, owayeyimeya ye-IFP kuMasipala wesiFunda waseZululand.
menzi.jele@ilanagnews.co.za
