SIYIGUBHE nezinkumbi zabantu ebezibuthelene eKings Park Stadium, eThekwini, ngoMgqibelo impumelelo yokunqoba izindondo e-United States of America (USA), isilomo somculi kamaskandi, uKhuzani “iNdlamlenze” Mpungose.
Lezi zindondo ezimbili azinqobe emasontweni amabili adlule – okungeyeBest Male (African) Artist neBest Independent Artist (African) kumaHapa Awards, uthe bekungaba yiphutha uma engazijabuleli nabantu bakuleli uKhuzani, njengoba enqobe eqhudelana nabaculi bakwamanye amazwe omhlaba angaphezulu kwayisithupha emikhakheni yakhe.
Ufike nazo zombili eziphethe esiteji, wazikhombisa izihlwele. Lokhu ukwenze emcimbini wakhe, iGcwalisa All White Spring Picnic, obungoMgqibelo eKings Park Outer Fields, eThekwini.
“Ngabe ngenza iphutha elikhulu uma lezi zindondo engizinqobile phesheya, ngingabakhombisi abantu okuyibona abangesekile emculweni, kusukela ngifufusa kwaze kwaba ngikuleli zinga esengikulona njengamanje,” esho.
Uthe ukunqoba kwakhe e-USA, bekuyingxenye yokuphakamisa umculo kamaskandi emhlabeni, nokuqhakambisa iNingizimu Afrika. Abantu bebephume ngothi lwabo, baziphatha kahle kwaze kwaba umcimbi uyavalwa ngo-12 ebusuku. Lo mculi uthi bekungelula ukwenza lo mcimbi ngenxa yokuthi kudingeka abaxhasi abaningi ukuze wenzeke ngempumelelo.
“Ngiyazi ukuthi abanye bebethi ngeke wenzeke lo mcimbi. Ngiyathembisa ukuthi nangonyaka ozayo usazobuya,” esho.
Ubonge uMnyango wezamaSiko namaCiko kuzwelonke ngokufaka isandla, uhulumeni waKwaZulu-Natal nezinkampani ezizimele. Okugqame kakhulu kwiGcwalisa wukuthi kunikwe abaculi abasebasha endimeni yomculo, ithuba ukuba yingxenye yokugqanyiswa njengoba bebefakwe phakathi kwabaculi abadumile.
Abaculi abebeboshelwe kulo mcimbi, baqokwe ngokuvotelwa ngabalandeli babo. Lokhu kwenze ukuba abaculi abaningi abadumile kumaskandi bakhale ngaphansi.
Phakathi kwabaculi abashiyelane inkundla kubalwa uGatsheni, AmaLegend (uShwi, u-Ali Mgube noThokozani Langa), uBuselaphi, Imithente, Izingane Zoma, AmaYellow Bone, uDj Tira, uMafikizolo, uNavigator, uMahostela, uNgena, uJumbo, iQwabe Twins, uMenzi, uDumi Mkokstad, uNdoni, uMayoghurt, Izintombi zikaMjaphane, uGandaganda, uMjikelo, uThandazani, uFalabo, uPhangandawo, uNjoko, uMajongosi, uMayonnaise, uDisaster nabanye.
mthobisis@ilanganewws.co.za
