IZOQHUBEKA nokuhlala esitokisini inkosi yesizwe saKwaNxamalala eMpendle eyanyaniswa necala lokubulala umshana wayo uMnu Nhlalayenza Ndlovu, owayeyikhansela leDA elingusotswebhu kuMasipala uMngeni, noMnu Qalokunye Zuma owayengundunankulu wesizwe saKwaNxamalala.
INkosi uSimphiwe Eric Zuma (56) ivele okwesithathu enkantolo yeMantshi yaseHowick namuhla ngoLwesihlanu. Bekulindeleke ukuthi ifake isicelo sokudedelwa ngebheyili. Inkantolo ithole umbiko wokuthi imantshi esebenza ngaleli cala ngeke ikwazi ukuphumelela emsebenzini ngesizathu sokuba buthaka komzimba wayo.
UZuma waboshwa ngamaphoyisa aphenya amacala athinta ukubulawa kosopolitiki, esemzini wakhe eMpendle emasontweni amathathu adlule. Maqondana necala lokubulawa kwekhansela leDA kwaboshwa noMnu Thobani Hlongwa, uMnu Khayelihle Shabalala, induna yaseMpophomeni uMnu Zwelithini Buthelezi, noMnu Thabo Mathonsi okuvela ukuthi wahlela ukubulawa kukamufi esejele eWestville.
Ngaphandle nangaphakathi bekukhona amalungu omphakathi abazokweseka inkosi. Bekukhona nabomndeni kamufi. Icala lokubulawa kukandunankulu lizongena kuyona le nkantolo ngomhla ka-22 kuNcwaba (August) kophezulu. Lolu wusuku okulindeleke ukuthi inkosi ifake ngalo isicelo sokudedelwa ngebheyili.
