UMANGAZE abaningi umculi wodumo uNtaba YaseDubai ekhipha isimemezelo sokuthi ngeke esakuvumela ukuqashwa emicimbini ukuzonandisa.
Lo mculi ubabele enkundleni yakhe yokuxhumana iFacebook lapho edalule khona lokhu. Ebhala kule nkundla uthe uyabonga kakhulu kubona bonke abamesekile waze wafika la.
“Ngithathe isinqumo sokungasayamukeli imicimbi noma ukuqashwa ukuzonandisa emicimbini. Ngihlukumezeke kakhulu kulo mkhakha… sekuyisikhathi sokuqhamuka no-plan B,” ebhala kule nkundla.
Unxuse labo abameseke kusukela eqala ukungena kulo mkhakha ukuba baqhubeke bameseke njengoba esezogxila ekuzenzeleni eyakhe imicimbi.
“Kusukela namhlanje, uma ufuna ukubona mina ngicula uzoba kuyimicimbi ehlelwe yimina. Ngiyabonga kakhulu, ngizoqhubeka nokukhipha umculo,” kuveza lo mculi.
UNtaba YaseDubai uke waba sematheni ngesikhathi kuqubuka ukungaboni ngasolinye phakathi kwakhe noBig Zulu ngengoma eyashisa izikhotha esihloko sithi, “Imali Eningi”.
Uphinde waba sematheni nangesikhathi elaxaza inkampani abeqopha ngaphansi kwayo i-Ambitiouz Records. Wakhala ngale nkampani ngokungamenzeli lutho emculweni.
