UMCULI usephumele obala ngokumphatha kabi okushiwo ngabantu ngaye ezinkundleni zokuxhmana.
ULwah Ndlunkulu ongumculi ongaphansi kwenkampani kaBig Zulu iNkabi Record udlulise ukuphatheka kabi kwakhe ngezinkulumo zabantu ezithi uzacile uqedwa insangu.
Lo mculi ubabele enkundleni yakhe yokuxhumana iFacebook edlulisa ukungaphatheki kahle kwakhe yilezi zinkulumo zabantu ngaye.
“Ingiphatha kabi ke kodwa le yokuthi ningibelesele ngokuthi ngizacile ngiqedwa insangu,” kubhala lo mculi.
Uqhube ngokunxusa nokukhuzq abantu ukuba bakuhloniphe ukushintsha komuntu ngenxa yokuthi kukhulwa ngezindlela ezingafani.
“Nezimo esibhekana nazo anizazi,” kusho yena eqinisekisa ukuthi akazidli izidakamizwa.
ULwah ungomunye wabaculi besifazane abenza kahle emculweni kwazise useke wahlabana nezindondo ezahlukene kulo mkhakha.
Uyaziwa ngezingoma okubalwa kuzo Ithuba, Paris ayicula noMthandeni SK, Amaphupho nezinye.
