PHUMLANI GAMA
ISHAYE indesheni kosomabhizinisi bemikhakha eyahlukene ukuba bangawushalazeli umasipala wayo iMeya yaKwaDukuza, uMnu Ali Ngidi. UNgidi ube ehlangene nosomabhizinisi bemikhakha eyahlukene emahhovisi alo mkhandlu ngoMgqibelo.
Inhloso yalo mhlangano bekuwukubonisana ngamaqhinga amasha okufanele asentshenziswe ukuze kwakhiwe amathuba emisebenzi. Phakathi kwezinto abakhale ngazo osomabhizinisi, wukwanda kwezigameko zobugebengu ezindaweni abasebenzela kuzona.
Banxuse uMasipala waKwaDukuza ukuba wenze okuthile okwenzayo ukuzama ukuvikela amabhizinisi abo, ngaphandle kokubeka ithemba labo emaphoyiseni.
UNgidi uthe okukhulu kunabo bonke wukuba basondeze osomabhizinisi nalabo abanesifiso sokuziqalela awabo amabhizinisi.
“Okunye esikubeke phambili wukuba siqinise umkhankaso wethu wokuba kugcinwe laba osomabhizinisi esesivele sinabo. Indlela yokubagcina wukuba senze isiqiniseko sokuthi bazithola zonke izidingo zabo.
“Bawusizo osomabhizinisi ngoba iningi labo liqashe abantu bendawo. Sizonxusa ukuba kumenywe nabanye osomabhizinisi. Sikhuthaza ukuthi labo asebenesipiliyoni bacathulise abasakhula,” kusho uNgidi.
