THANDI ZONDI
UMASIPALA weTheku ugcine ufinyelele esivumelwaneni sokukhokhela osonkontileka ababhekelele ukulungiswa kwamapayipi (plumbers), obese kunesikhathi eside bedonsisana.
Lokhu kuvezwe yiMeya yeTheku, uMnu Cyril Xaba (esesithombeni), ngemuva kokuba bebenomhlangano nalabo sonkontileka.
ILANGA labika kabanzi ngalolu daba ezinyangeni ezedlule, lapho okwavela khona ukuthi osonkontileka ababalelwa ku-250, sekuphoqe ukuba bayeke ukusebenza ngenxa yokuthi umkhandlu kawubakhokhelile, kusuka ngasekuqaleni kwalo nyaka.
Baveza ukuthi impilo inzima njengoba ezinyangeni ezedlule, begcine bethatha emalini abebeyibekile, abanye benza izikweletu ukuze bakwazi ukukhokhela izisebenzi zabo, nokwenza ezinye izidingo zempilo.
Bathi ngemuva kokuyeka kwabo ukusebenza – ngenxa yokungaholelwa – umkhandlu waqoka ukuqasha usonkontileka omkhulu (main contractor), okunguyena osezokwenza umsebenzi wabo.
Lokhu kwaholela ekutheni labo somabhizinisi baqale imibhikisho ngaphandle kwamahhovisi abhekelele amanzi ePinetown, bekhala ngesenzo sikamasipala.
Esinye sezikhalo kwakuwukuthi usonkontileka omkhulu ufuna umhlomulo omkhulu emaholweni abo. Ngempelasonto, uXaba uveze ukuthi bafinyelele esivumelwaneni sokukhokhela labo sonkontileka.
Uthe kulo mhlangano bekukhona ikhansela uMnu uMdu Nkosi, elingusihlalo weTrading Services Committee noMnu Siyanda Mwelase, obemele osonkontileka.
Uthe phakathi kwezikhalo ebezikhona, bekungamaholo nokuqashwa ngosonkontileka abakhulu abasohlwini (database).
Uveze ukuthi kugcine kuvunyelwana ngokuthi imali yehora, eyizigaba ezintathu ezahlukene, ngeke ishintshe izoqhubeka 
kanjalo.
Kuvunyelwane nangokuthi u-15% wokuphathwa (management fee) ngeke usathathwa emaholweni osonkontileka. Kuthiwe osonkontileka abawu-5 abakhulu bazoqasha osonkontileka abancane, kulaba abakwi-database yomkhandlu, abawu-1 886, futhi kasikho isisebenzi esizovunyelwa ukusebenza kwingqalasizinda kamasipala ngaphandle kwemvume.
Uthe ukuqashwa kosonkontileka abawu-712 be-shift yokuqala sekuqalile, kanti abawu-337 kubo baqashwe ohlwini lukamasipala oluvele olukhona.
