UMZWILILI wakuleli uMawhoo uhalalisele waphinde wafisela uMthandeni SK okuhle kodwa ngomcimbi iMthandeni Summer Picnic obuseMdletsheni eMtuba abewenze ngempelasonto.
UMawhoo obengelinye lamaciko anandise kulo mcimbi obe yimpumelelo ubabele enkundleni yakhe yokuxhumana encoma uMthandeni ngokuba nenhliziyo enhle nokwazisa omunye umuntu.
UMawhoo ocula noMthandeni engomeni ehlukanise unyaka esihloko sithi Gucci uphinde wabonga ngokuthi abe yingxenye yale ngoma enkulu eNingizimu Afrika kulezi zinsuku.
“Kade ngangifisa ukwenza ingoma enkulu kamaskandi,” kubhala lo mculi ezibongela.
Uchaze uMthandeni njengomuntu okhuliswe kahle futhi ophuma ekhaya elimfundise kahle.
“UNkulunkulu akwandisele, unenhliziyo enhle futhi uyamazi omunye umuntu.
Uqhubeke njalo nakwabanye,” kubhala uMawhoo.
