ITHUBA eliyingqayizivele kubasiki bengqephu baseMgungundlovu lokukhangisa ngemfashini kwiPietermaritzburg Fashion Extravaganza: Spring Collection 2025.
Umhleli walo mcimbi uClive Hadebe uthi lo mcimbi uzovula amathuba kubasiki bengqephu abasakhula kanjalo nakulabo asebezimele.
“Leli yithuba labasiki bengqephu lokutshengisa imisiko yabo nokukhula emikhakheni abakuyo. Lo mbukiso sihlose ngawo nokugqugquzela umphakathi wakithi ukuba uthenge izimpahla zokugqoka ezithungwe eNingizimu Afrika ukuze kudaleke namathuba omsebenzi,” kuchaza yena.
Lo mbukiso uzoba sesikoleni iSt Nicholas Diocesan mhla ka 4 ku-October 2025, kusukela ngelesi 12:00 emini kuya kwele- 16:00 ntambama. Umsiki wengqephu ngamunye uzotshengisa imisiko yakhe ekhethekile ewu-15. Kuzotonyulwa ababili abaphume phambili bayotshengisa ngengqephu yabo kwiKhayelitsha Fashion Week 2026 ezoba seCape Town.
UClive Hadebe uthi unesifiso sokuthi lo mbukiso ukhule, uthi akuqaphelile ngoMgungundlovu wukuthi kawunakekile kepha uqukethe ithalethe. “Maningi amathuba akhona kwezemfashini nasevulelekile kubasiki bengqephu. Embukisweni kusuke kungesizo izethameli nje kuphela, kunezitolo ezisuke ziyingxenye yalo mbukiso . Lokhu-ke kuvulela ama-designers ithuba lokuthi umsebenzi wawo utholakale nasezitolo ezinkulu,” esho. Amawele odumo eThe Real Wives of Durban, u-Ayanda Mthembu no- Andile Peterson bazobe beyizimenywa eziqavile kulo mbukiso.
Amathikithi okungena abiza uR100. Ngeminye iminingwane abahleli bomcimbi batholakala kuWhatsApp 081 805 0456
