ISIGUNGU esiphezulu se-African National Congress (ANC), sisichithile isicelo sikaNgqongqoshe wamaPhoyisa onikwe ikhefu elisipesheli, uMnu Senzo Mchunu, sokuthi ahoxe ekwenzeni imisebenzi yenhlangano.
UNkk Mahlengi Bhengu-Motsiri, okhulumela i-ANC, uthi emhlanganweni weNational Executive Committee (NEC), obungempelasonto, udaba lukaMchunu kukhulunyiwe ngalo, kodwa kwathathwa isinqumo sokuba aqhubeke nokuthamela imihlangano yenhlangano, futhi akhankasele uKhongo-lose njengoba kunokhetho loHulumeni baseKhaya ngonyaka ozayo.
“Kayikho inkantolo esithole uMchunu enecala, futhi kalikho icala asebekwe lona. Ngakho useyilungu lenhlangano, futhi usazoqhubeka nokwenza imisebenzi yenhlangano,” esho.
UMchunu uthwale kanzima ngesikhathi ephonswa imibuzo yikomidi lesikhashana lasePhalamende elibheka izinsolo ezenziwa nguMkhuzi wamaPhoyisa KwaZulu-Natal, uJenene Nhlanhla Mkhwanazi, zokugxambukela kosopolitiki ekusebenzeni kwamaphoyisa.
UMchunu usazovela kuKhomishini kaJaji Mbuyiseli Madlanga, nayo eyenza okufanayo nekomidi lasePhalamende. Abantu asebethule ubufakazi ekomidini lasePhalamende, bakhomba uMchunu ngenjumbane ngokuzama ukuhlakaza iPolitical Killings Task Team (PKTT) eyasungulwa ngo-2018, ukuphenya ngokubulawa kosopolitiki.
UMchunu nengqapheli yezodlame uNkk Marry De Haas, kuthiwa yibona ababanesandla ekuzameni ukuhlakaza iPKTT. Usomabhizinisi osahamba amacala, uMnu Vusimuzi “Cat” Matlala, nomngani wakhe, uMnu Brown Mogotsi, kuthiwa yibona ebebefaka uMchunu ingcindezi yokuhlakaza iPKTT.
UMengameli uCyril Ramphosa ngomhla ka-13 kuNtulikazi (July), wanika uMchunu ikhefu eliyisipesheli njengoba kusaphenywa ngezinsolo zikaMkhwanazi.
