UGABE ngalingisi abanohlonze umdlalo omusha owuchungechunge, iPimville, ozongena esikhaleni seMuvhango ebisiqede iminyaka ewu-28 isakazwa kumabonakude. Lo mdlalo uzodlala phakathi nezinsuku ngoMsombuluko kuya kuLwesihlanu ngo-21h00, kusukela ngomhla ka-9 kuNhlolanja (February).
Ugabe ngabalingisi esingabala kubona uGail Mabalane, uClementine Mosimane, uLillian Dube, uThapelo Mokoena, uCharmaine Mtinta, uKeke Mphuti, uMatli Mohapeloa, uMondli Makhoba, uMichele Mosalakae, uFulu Modibedi, uJesse Suntele, nabanye.
Lo mdlalo uxoxa ngezothando, izifiso zokuvelela nokukhaphelana phakathi kwabantu. Uxoxa ngokubekezelelana emphakathini nokuba nethemba, nakuba izinto zingahambi kahle.
“IPimville iyincwadi yothando exoxa ngobulokishi, ngobunjalo balo. Besifuna ukwenza umdlalo ongezukujabulisa nje kuphela, kepha uphinde uhloniphe ukubekezela, ubuhle namandla omphakathi. Ukuhlanganisa lo mdlalo neSABC 2 kube wukufezeka kwephupho,” kusho uRashaka Muofhe, oyi-Executive Producer kwiBakwena Productions, ekhiqiza lo mdlalo.
UDichaba Phalatse oyiMenenja kwezokuMaketha kwiSABC Video Entertainment uthe: “KwiSABC 2 sizinikele ekuxoxeni ngezindaba eziveza ubu-njalo babantu bethu. IPimville kayisiwo umdlalo nje kuphela, kepha iyisibuko somphakathi, iveza imishikashika, amaphupho nokunqoba kwaselokishini.
“Sikholelwa ekutheni lo mdlalo uzozwana nababukeli, bese ufaka isigxivizo sokuthi nembala uSABC2 uyikhaya lokwehlukile nokugqugquzelayo, okuvutshelwe ekhaya.
