BAZIBOPHEZELE ukuqhubeka nokukhiqiza ubhontshisi ngazo zonke izikhathi zonyaka abalimi baKwaNondabuya, eJozini, ngaphansi kwesiFunda uMkhanyakude.
Abalimi baseJozini izolo ngoLwesithathu bahlangane noNgqongqoshe wezoLimo nokuThuthukiswa koMphakathi KwaZulu-Natal uNkk Thembeni Madlopha-Mthethwa, obefike nezikhulu zenkampani ethengisa ukudla yaKwaDukuza, ebizothenga ubhontshisi wabo.
Abalimi bakule ndawo bayaye bahlangane, balime ubhontshisi kanye nezinye izitshalo okubalwa kuzona nombila. Bangu-300 abalimi okuthengwe isivuno sabo – esilinganiselwa ku-10 tons.
“Sixhaswe wumasipala wendawo ngezinsiza kusebenza. Kwasisiza kakhulu ukuthi sithengelwe izimpahla zokusebenza ngoba kunamuhla sesiyahlomula ngokuthi kuthengwe imikhiqizo yethu. Sizibophezele ekutheni sizoqhubeka nokutshala ukuze sikwazi ukuthengisa ngaso sonke isikhathi,” kusho uNkk Qondeni Gumede.
UNkk Madlopha-Mthethwa uthe isifiso sakhe wukuthi bonke abalimi angaphansi kwale ndawo baxhaswe ngezinsiza-kusebenza kuphinde kuqiniswe namaxhama okuhwebelana phakathi kwabo nezinkampani ezithengisa ukudla.
“Sizoxoxisana nezinkampani ukuba zibasize ngolwazi okuhlanganisa nokuqeqeshelwa amakhono ahlukene. Sikhuthaza nokuthi kuqiniswe ukuhwebelana nokuthengwa komkhiqizo wabo. Sikhuthaza nokusebenzisa okuhle phakathi kwabo abalimi. Ngiyafisa nokuthi ngiqhubeke namazwi ami okusho ukuthi isiFunda uMkhanyakude siyinhliziyo yomnotho wesiFundazwe iKwaZulu-Natal, ngasohlangothini lomnotho otholakala enhlabathini ngokulima,” kusho uMadlopha-Mthethwa.
